食Pizza喇！

cyt辭職後就進註男友開既PIZZA店掛單，執頭執尾賺份零用傍下身咁。

PIZZA店位於一個小島上面，由於交通唔算太方便，所以cyt都好少出街，主要就看鋪，原來都幾困身的，因為無論有冇生意都好，都需要有人係鋪到stand by，人家話做生意要「守」，係真的。

於是cyt都手多多學下整pizza。

當然，認識cyt或者有睇之前既blog的話，都應該知道cyt煮野食有幾勁，cyt識整個皮有成吋厚既雷沙湯圓，同埋海鹽蛋糕（即係唔小心將鹽當做糖落去整蛋糕），於是，朋友聽到cyt有份整pizza，都好擔心店既生意。

不過大家可以放心，cyt都好安落，因為餅底同醬汁係師傅整的，cyt只係將d材料放係個pizza到，之後師傅就會放入爐，又會記得拎返出黎，而材料係唔駛煮，所以唔會存在pizza質素既問題！放心食啦！於是無聊聊的時候cyt就會入去廚房砌下pizza，師傅叫cyt做「賣大包女郎」，因為次次cyt都喪落料去個pizza到，攪到個pizza成呎厚。

有時係炎熱既下午，係一條寧靜既小村入面，cyt係店入面靜靜的砌pizza，耳仔又聽下歌，好舒服，落雨既時候就睇下門外既街景，與世無爭的都不錯。

If you enjoyed this post, make sure you subscribe to my RSS feed!

奇怪

近排真係好多現象真係令cyt有d奇怪….

何解而家圖書館既簡體字越黎越多？數量彷彿超越繁體字書，cyt每次見到成個書櫃充斥住簡體字書都有一種「淪亡」既感覺，當然係cyt呢個香港人既心目中繁體字固然係王道，坦白講，當cyt對住某種有興趣既書種但又見大多數都係簡體字書時，真係，唔多開心，尤其是係一d比較學術性既，cyt更希望睇返自己睇慣睇熟既文字…唔係本書悶之時仲要費神去睇簡體字就更覺攞命，而且由細到大都係睇開繁體呀，硬係覺得簡體字冇咁靚。

記得好耐之前曾經傳過香港要轉用簡體字，唯望圖書館唔會係呢個行動既開始吧…如果係…真係不知點算好，我怕我會喊。

今日去到荃灣圖書館，抬頭望住個又繁簡既書櫃…真係呆。

cyt都好奇怪點解d人講野之前唔用個腦諗諗….

點解而家去醫院要先比錢先肯救人?平時都唔多覺d醫院有呢個情況架?cyt覺得開口要傷者家人比左個兩萬蚊先做野救人個位職員都幾叻架嗃，咁都講得出口，cyt以為做醫護人員同家人坦白講病人失救就最困難，但我相信係死人冧樓之時叫人地比錢先做野仲難，而又真係有人做到嗃。有傳其實地方既醫院都會係咁，一定要你比錢先救人，唔係就由得佢地死，但一個比較正常少少既人都會諗到係香港，發生咁大單車禍，你同傷者家人講比錢先救人，以香港人既性格同埋香港傳媒既監察能力，你仲咁講係咪搏比人炳？咁你會話，咁可能係佢上司叫佢咁講呢，但老細叫你做野時你都可以用郁郁個腦先丫，呢條擺明係死路你都照行？同埋cyt都好想知，係香港既醫院遇到同一個情形，傷者真係冇錢比，d醫護人員係咪真係唔做野救人？

明未？

If you enjoyed this post, make sure you subscribe to my RSS feed!

忽發奇想 - 自己和自己相處

每個人睇自己都係最好的，但望住其他人，就會發掘到人地既缺點，人家既問題。
當然，你未必會講出口。
而當然，人地都未必想知，聽到都唔入耳，因為實在太刺耳。
個人如是，一個家庭如是，大公司是大機構如是，政府更如是，好正常者。
勇敢而誠實既人會坦白同對方講，但後果可以好嚴重，輕則拂袖而去，冇朋友做，重則死人冧樓，命仔都冇埋。
如果，如果可以既話，比一日時間大家，複製自己，同自己相處一日，可能就會發現，完美既自己係幾咁難頂，脾氣係幾咁臭，做野係幾咁蠢，最攞命既係，你係冇得投訴，唔通你投訴你自己咩，鬼叫你自己衰格呀。
同樣地，公司老細多個複製人，自己服侍自己。原來自己咁自以為是，幾咁自大。
高官試下自己求自己做野，自己聽自己解釋，自己聽自己係公眾面前講，聽下，自己講野有幾咁荒謬。
迫害人既人試下被自己迫害。原來自己咁唔合理，幾咁冇陰公，幾咁天怒人怨。
發達咯，世界美好好多，仲駛咩搵咩監察組織。
自己和自己相處一日就夠。
問你死未。

If you enjoyed this post, make sure you subscribe to my RSS feed!

噢，好毒的MARCO啊！

想就想左好耐，不過就冇試過，終於今日男友既同事A借左支100mm marco比cyt玩下，咁岩屋企有蘭花，噢，毒死人了，但好貴啊，但貴得黎又覺得好抵啊，抵得黎又好開心個下弊，弊得黎近排要慳d洗，但呢個世上又有樣野要免息分期….掙扎中。

If you enjoyed this post, make sure you subscribe to my RSS feed!

最後一日

由cyt遞信到最後一日，足足糾纏了差不多兩個月，過程猶如分手一樣，而cyt就在工作的歲月裡，第一次做了職場陳世美。那故事嘛，就差在沒有一個現代包青天把cyt斬了。

無論如何，最後一日已過，從今天開始，cyt告別繁忙的灣仔，離開早上拿著咖啡的人，走進一條小村裡，開始過著賣pizza的日子。

祝福，自己，阿門。

If you enjoyed this post, make sure you subscribe to my RSS feed!

Sugar & 小B@馬灣

冇見兩隻野成年幾，終於因為cyt長期係馬灣生活，而馬灣同荃灣確實係近。而馬灣又係一個同狗玩既好地方（成個馬灣都係狗，好多人養狗，多到泛濫）。於是神奇姐姐加姐夫同朋友大口一齊入黎馬灣玩，順手探下CYT。

神咁早八點幾已經帶住兩隻癩狗殺入黎，見到兩隻野真係開心到要攬住錫。

想當年SUAGR細細個就玩到岩岩畢業既CYT無助地坐係家姐屋企喊，到而家已經七個年頭，SUAGR已經變左一隻肥到下巴打摺既狗熟女。當然呢位熟女就算肥都係風采依然，佢對寶藍色既眼睛依然令我地覺得佢係史上最靚既雪橇。而且佢依然保持高傲既性格，到而家出街都要人拉住，如果你夠膽放手，佢係唔會顧念主人既情義而走左去，搵都搵唔返。同埋當見到另一隻雪橇女而又瘦佢好多我同姐姐激讚人家身材纖瘦時，佢係會失禮地襲取對方。

至於小B，佢已經長大成人喇，雖然身型矮小，而且除左對耳仔之外冇一忽似雪橇，但係白雪雪既佢再加上咀尖尖，真係好一隻靚狐狸，仲識望海扮有型。

雖然小B DNA出錯，CYT成日覺得佢低低地，但係佢有樣野好，就係唔係拉住周圍走，因為小B已經認左SUGAR做大佬，所以只要SUGAR去邊，佢就會跟住去邊，唔會走出SUGAR五呎外，只要帶住SUGAR就得了。如果小B唔見左SUGAR，就會好慘咁叫，不過睇返SUAGR那邊，就知其實佢好想甩左小B，平時理都唔理佢，食野飲水都要自己飲完食完就比小B食，小B真慘，跟左個唔想比佢跟既大佬，而姐姐更慘，出親街都要一拖二。

不過無論兩隻野幾衰幾古惑都好，我地都會好錫佢地的。

If you enjoyed this post, make sure you subscribe to my RSS feed!

屋企多了隻老鼠兔

自從cyt三隻愛兔相繼離開之後,cyt都冇諗過再養兔仔,不過命運既安排另相中既老鼠仔來臨我家,成為我屋企既一份子

首先要講講老鼠仔既身世,都幾可憐架,話說佢係cyt家姐既愛兔,但兩個d八字可能唔多夾,老鼠仔就真係變左隻老鼠咁驚青,成日坐係個籠到唔肯行出去,好似出面有毒咁,就算你抱佢出去,佢都會用九秒九既速度飛返入籠。

過冇一段時間我家姐養左兩隻貓貓,老鼠仔就越黎越細膽,可能d貓貓趁平時返工冇人既時候就嚇老鼠仔,嚇到佢家陣short short地。而呢個時候cyt父母冇左幾隻兔仔心靈都比較空虛,於是老鼠仔就順利成章既搬入黎。

雖然老鼠仔大大話話都係我屋企住左幾個星期,但佢依然好驚,好似我同我爸媽三個係貓咁,無論平時開門閂門、開電視機、電話響、甚至講野,總之有任何聲響,老鼠仔都好似癲左咁係個籠到跑黎跑去,十分驚慌,咁我地唯有動作輕D,同埋多D講野,等佢習慣屋企有三個人,唔係三隻貓,同埋多D模佢,買好味零食比佢,同埋長時間打開個籠,希望佢有朝一日會行出去呢個門口。

至於要幫佢清潔個籠就更加困難,因為老鼠仔驚到好似間屋比人拆卸重建咁,誓要同我地抗爭到底,又咬人又發脾氣又叫,真係陰公。

於是屋企就多左隻患上妄想被迫害症既兔仔,而我屋企就變左間兔兔青山。:P

If you enjoyed this post, make sure you subscribe to my RSS feed!