匆匆

食譜轉載自：可可夢的甜夢窩

呢個份量可以整到一盒到啦，人少少都好夠架喇，想整比d親戚朋友就將份量加倍。年糕都好易整，係蒸個下耐，都攪成個鐘。但又真係幾好吃嗃，又有陣陣的椰子香。

加粒紅棗，真係送禮自用皆精品呀。

If you enjoyed this post, make sure you subscribe to my RSS feed!

有一日，因為男友講話想食個腸仔包，於是cyt膽粗粗的搵個腸仔包食譜整黎試下，先發覺整唔難，因為個都有d似整pizza，cyt都做慣做熟，但要揉到麵團靚一靚先係高難度。

其實整麵包幾好架，雖然要用好多時間發酵，但發黎發去個陣可以做下其實野。

食譜呢，大家上網都可以搵到，係google打腸仔包食譜，d食譜多到你數唔哂。

搓到起根有薄膜之後就拎去發酵，，如果用機搓其實幾分鍾都攪掂，但cyt懶係親力親為，搓足半個鐘！
因為鋪頭個爐夠熱，所以放係個爐下面已經有好好既效果。

一個鍾頭之後快高長大，成個盤底都遮住哂，cyt會用隻手指篤一篤冇彈返起就ok了。

將麵團分成8件，再發多15分鐘。

半條廚師腸一個，特別核突既係cyt整既，比較靚既係出自師傅對手，無計，所以人地係師傅。

又等一個鐘…….又發大d喇….搽d雞蛋上去就可以拎去焗喇!

攪掂！奉勸大家整多少少，一次整得個八個好似好多，但一家幾個食下食下，第二朝又早餐又成就整多多都唔夠。

If you enjoyed this post, make sure you subscribe to my RSS feed!

當不滿這樣的生活環境而自身又無能力改變，離又離不開的時候，你只能說：「我已經比人家好千萬倍了，怨甚麼？」

然而這一番自我安慰的說話，跟所有自我安慰的說話一樣，沒有太多的效用，內心還是感到戚戚然。

If you enjoyed this post, make sure you subscribe to my RSS feed!

cyt總覺得，紅豆沙係一道被一般大眾睇小既糖水。

冬天既時候食返碗雪梨糖水，你會覺得好滋潤；夏天既時候來一個綠豆沙，你會覺得涼浸浸；女士們焗個簡單的紅棗水，夠補血，。要是朋友們家人為你來一煲湯水或者腐竹雞蛋糖水，你會覺得好正，但紅豆沙一出，無論係出街食，或者人地煮比你地食，甚至你手痕想煲糖水既時候，都會諗：「紅豆沙好普通者，周街都有得食啦！」

紅豆沙又真係幾普通，因為十次去飲，九次都係食佢，食到大家都唔想食，十次去酒樓食飯，問侍應有冇甜品，紅豆沙啦（桂花糕可能僅隨其後）。大家面對住一碗碗唔係太多蓮子百合或者咩都冇淨係得紅豆甜到冇朋友既紅豆沙，你厭倦了，再加上一兩次食到既可能只係一撻水咁稀既所謂「紅豆沙」，你累了。於是出街食甜品，你會叫多芒小丸子，唔記得紅豆沙了，因為「十次去飲，九次都係食佢」，太普通了，比錢食，唔抵。自己煮？你又覺得出手太低，都係焗個芝士蛋糕勁ｄ。

於是大家遺忘了。

但cyt記得小時候媽媽最常煲的就係紅豆沙，而且一煲就一大煲，一日幾餐食幾日都未食得完，而且係起沙的，有時就見到一煲野係廚房到滾滾下，煲入面永遠有一圈既豆渣圍邊。cyt就覺得，煲紅豆沙，好易者，呀媽成日都煲架啦。

於是今日cyt係鋪頭又試下煲，原來要煲到起沙，要幾個鐘頭的，火太細d紅豆又唔淋，火太大又黐底。蓮子百合淋得黎又要有咬口，陳皮太多又搶哂味，太少又唔夠香，冰糖太多又驚唔健康，太少又覺得冇味道。又原來紅豆可以除熱毒，蓮子可以補氣益腎，百合又可以潤肺止咳。如此簡單係鋪頭賣最平既紅豆沙，要煮唔係易的，都要花心機，都要比時間，第時有人煲比你食既時候，你會唔會又覺得太普通呢，又或者第時煮野比人食，又唔會唔會考慮下呢一款最傳統又common但幾溫馨既糖水呢？

糖水如是，人亦如是，身邊看似最普通既人，為你做最平常，甚至你覺得好無聊既事，可以好溫暖，一樣咁有益。

If you enjoyed this post, make sure you subscribe to my RSS feed!

其實cyt唔係話好鍾意整麵包，雖然鍾意食，但硬係覺得麵包同pizza都係差唔多。cyt最想整糕點呀、蛋糕呀咁，但唔知係cyt實在太冇天份丫，定係煮野既時候太唔小心，蛋糕永遠都發唔起，紅豆糕又永遠都雪唔實……但麵包又搓得ok嗃，所以繼續整pizza同麵包囉。

If you enjoyed this post, make sure you subscribe to my RSS feed!

係一個沉悶既星期一晚上，一對印尼藉既夫婦就住係一個小島既村屋既二樓，呢個夜晚同平時既夜晚一樣，太太打算去附近既pizza鋪買個pizza當做一餐，於是佢就走去樓梯打開個鞋櫃拎對鞋出黎落街… …

就係佢打開櫃門既一刻，一大舊黑色既物體從櫃中撲出，由於樓梯比較黑，太太比呢舊黑色野嚇到花容失色，尖叫起來！

太太同老公一齊跑到樓下，係大閘附近發現原來係一隻貓！貓貓衝出鐵閘直奔出去，跑到村屋既欄杆下停低，於是村民們就圍住隻貓等佢唔好再走失。

太太見到原來係一隻灰色既貓貓，點解可以匿埋到入個鞋櫃裡面呢？而樓下又大閘一道鎖住，隻貓係邊到黎呢？太太去到pizza鋪買野既時候就同老細講左呢件事，好心既老細就走去八卦下，見到呢隻貓貓嚇到騰騰震的瑟縮於一個角落，四圍有好多人圍觀，甚至連村屋二樓既居民都探頭張望。

大家你眼望我眼又望貓貓，貓貓繼續震，老細發覺大家都得個望字，咁點先，都要有人做野架，但大家又唔多似想做野嗃，一股熬血汨汨的流在老細身上，於是佢決定攬起隻貓上身，帶佢返鋪頭！本住我攬貓就攬到底既精神，照顧佢。

貓貓震震下咁實在我見猶憐，好在老細都有養狗，總算搵到個籠安置貓貓，等佢訓係鋪頭既房入面，師傅通宵陪貓貓，聽到貓貓係個寵到叫下叫下，嘈到拆天，真係心酸到訓都訓唔著呀。

第二日好心的師傅見貓貓係個寵到無自由失自由，於是放佢係房入面行下，間房雜物多就必然的，雖然貓貓年紀大而且成隻狗仔咁大隻，但佢依然可以極速搵到窿罅收埋自己，於是師傅同老細女友每次入房，都以為唔見左貓，係一間100呎都冇既房入面搵貓都例必搵成幾分鍾，無論佢地點樣努力填好哂ｄ窿窿罅罅，但貓貓都可以搵到位匿埋，彷彿無數紙盒入面有個迷宮，只有佢自己先知道。有時又會係一D放左好重野既盒下面，郁都唔郁，大家都以為Ｄ盒責暈左佢，於是不停地搬開哂Ｄ野，貓貓就望住兩個傻瓜搬野。

更令人擔憂既係貓貓彷彿放棄自己唔食野唔飲水，可能佢以為主人唔要佢（但其實係佢自己離家出走，不過貓貓都未必記得誰是誰非），繼而作出自殺式行為，各位街坊亦都好人到非常，拎各式各樣既貓糧用品比老細，而且上網尋親，通街既貼街招，都係為搏貓貓一笑，最後貓貓捱到夜晚先肯食野，真係望穿秋水呀。成日大家既心就懸於呢隻老貓身上，做做下野都要入房睇睇佢，殊不寂寞。老細既愛貓女友眼見想養貓但老細唔比養，今次老細自己執隻貓返黎仲唔係天意黎？發達咯，女友係呢兩日已經對老貓產生感情，由憐生愛，就算係肥係老貓都唔會放棄佢。決定如果三日內冇人認領貓貓就據為己有，一個星期後就唔駛旨意佢交返隻貓出黎，佢就可以養呢隻可憐既老貓到老。

當然啦，個天就緊係唔會比呢個傻婆發達啦，第三日貓貓既主人現身喇，原來主人一家初黎報到，住係印尼夫婦樓上，仔仔出街唔小心打開左到門，MIMI（即係貓貓）就走左出落樓匿係印尼鞋櫃入面。貓貓見到弟弟都即時貓叫兩聲打個招呼，而弟弟真係抹一把汗，因為錫MIMI錫到燶既媽媽又喊又叫黑哂口面，鬧到佢飛起。

CYT今朝送貓送到西，見到MIMI返到屋企賓至如歸，肥大既尾巴搖搖下，大字型訓係走廊到，內心都好安慰。但一陣陣既失落又上心頭，諗起假期過後返到鋪頭就冇得再心掛掛喇… …實在好空虛。

CYT趁今日休息，出去金魚街睇下D貓貓，得閒就拎貓貓張相出黎慰藉下… …諗起呢隻萍水相逢貓，真係帶比CYT好多漣漪… …

If you enjoyed this post, make sure you subscribe to my RSS feed!

Once upon a time，有個傻婆唔小心將佢部HTC3600趺爛左，由於整返都無謂，於是呢個傻婆決定一生不愛別人，退出PPC既行列，但係個天並無放過呢個傻婆，兩個季節後既一個旺角夜晚，samsung omnia ii既身型係衛訊既窗前向呢個傻婆招手……一時間，毒癮走遍呢個傻婆全身。

cyt實在感激facebook，當你有d野想買而唔好意思講出口既時候(尤其係明知自己親手跌欄幾千蚊電話之後)，facebook可以幫到你！將你既願望post上去吧！有心既人就會做野架喇！

黑色鋼琴面既omnia望上去真係靚到出塵，佢既面積比3600大但係薄好多。而cyt實戰左部機呢個段段既日子，暫時可以用五個字去形容：「客家佔地主！」

cyt係呢個手提到搵到有優點，有缺點，尤其係設計上既缺點最多，而又最令人苦惱，因為會用得好唔方便，如果大家發現cyt講既問題係有得解決，請大家幫幫手！

部野靚唔靚就各花入各眼啦，基本上佢既設計好乾淨的，但d制就太簡單了，首先佢冇十字制，冇左襟上下左右既功能，唔可以一手操控部機，一定要用筆，都幾唔方便，尤其係睇書既時候就更加不便。其實佢側邊都有兩個制，但只可以用黎較大細聲，cyt攪黎攪去都搵唔到令佢地可以邊成上下制既設定，感覺好死板，其他制都可以set其他功能啦，點解唔順便放埋呢兩個呢？另外支筆係附於機身外的，cyt以前用開係部機到忟支筆出黎，有d唔習慣，不過講開支筆都真係幾型啊～

規格方面，800MHz  CPU、WVGA、行Windows Mobile 6.1， 500萬像素鏡頭+閃光燈、藍芽 2.0 + EDR、WIFI、HSDPA 7.2Mpbs再黎多個收音機，真係夫復何求！內置8GB記憶令隨機附送既4GB咭感到自卑。成部機Samsung都好積極地用自己既版面，就咁睇真係以為自己唔係用緊WM機，主版面Samsung都提供大量Widget裝飾自己既today畫面，令到個畫面熱鬧到非常，好靚好開心的樣子，但開心的背後cyt感覺到d widget拖慢左部機，所以最後都係用返傳統既wm畫面算了。

程式集都係有Samsung版面的，所有程式都分門別類，好似iphone咁，用手指一橫就可以shift去另一版程式集到，都係好值得一讚的，至少唔會成堆程式堆哂係一版到。 

 基本上SAMSUNG既版面都係好動感的，就連關閉工作程式都型Ｄ。

（仲有好多操作上既野想同大家分享下，待續）

If you enjoyed this post, make sure you subscribe to my RSS feed!