August 22, 2008
我的生活小小事 No Comments 尋日收到男友電話話有鋼琴會，於是cyt抆住男友衫尾去audi係會展既olympics celebration night見識下，原以為只係一場普通既音樂會。放工去到先知原本請左郎朗表演，表演之前仲有個Cocktail酒會。
去到會展既大堂見到四圍入場既人都著到好華麗咁，真係有d似去ball咁，望望自己著到好似隻番薯咁（問心個句真係幾薯…），d 靚靚model著住條黑色吊帶緊身短裙排開迎賓，令cyt感覺更番薯，門口仲有好多記者係到影d明星，坦白講cyt都未去過高檔既場合，於是係咁跟住男友走黎走去。
男友問cyt點分在場既人邊啲係真正既有錢人而邊啲好似cyt咁係番薯呢，答案可能就係cyt隻手同個口入面：就係狂食入面d小食同飲人地既香檳。皆因當時都七點幾，cyt餓到癩癩地，於是見到d waiter捧住盤一碟碟精緻既點心盤走黎走去請cyt食，由於d小點心真係幾好食但又太過精緻，食極都好似冇食過咁，於是cyt情不自禁地跟住d waiter既行走路線想拎野食，順便又唔覺唔覺地飲左人地好多香檳，d小點心得一蚊銀咁大個cyt都食到飽肚，你就知我食左幾多。實在係一隻不折不扣既番薯，但確實好肚餓，而且個場合行行企企，真係有d悶，cyt對車又冇咩興趣又有排先入場聽鋼琴，有咩好做者，咪食囉。
cyt對鋼琴冇咩大認識，實在唔識同大家講郎朗既琴技有幾精湛，唯一既印象就係覺得佢既手指快到好似曉飛咁，而且彈得好激昂，cyt好奇郎朗咁彈法，啲手指會唔會好痛呢？但音樂自有其神奇之處，就係令你可以集中地聽，個腦咩都冇諗過，空白地簡單地，身體所有部份都停頓，只係掛住聽，單純地聽佢既鋼琴聲，情緒不其然地起伏，琴聲完結，成個人放鬆哂，精神哂。
cyt認為咁樣既音樂，就係好既音樂。
郎朗完成表演之後都會講一陣野，當大家起哄想安歌時，佢就拎出二胡一個，原來郎朗既爸爸係二胡既高手，而且同佢一齊黎左香港，於是兩父子表演左一場二胡鋼琴合奏，郎朗仲講笑話以前兩父子經常合奏，但而家老父架子越黎越大，合奏既機會就少左好多。原來二胡夾鋼琴都幾好聽，表演結束，掌聲如雷，拍爛了cyt既一對手掌。
If you enjoyed this post, make sure you subscribe to my RSS feed !
July 30, 2008
我有話要說 No Comments Where do we go from here?
Certainties disappear
Deep in my heart I’m concealing
You must love me
You must love me
If you enjoyed this post, make sure you subscribe to my RSS feed !
July 25, 2008
我的生活小小事 5 Comments cyt今年就跟往年一樣，早已跟公司請了半天的假，向全世界發出警告：cyt下午一時即走，不得有誤！好心的同事們見cyt為了書展興奮良久，都義氣的將cyt下午的工作都一一承擔，感激感激。
吃完午飯便去會展排隊，星期四的下午人雖然多，但不至於像過去幾年般要等半個甚至一個小時等入場，很快的便可以進入會場買票。cyt對於書展還是有點點的瘋狂，始終那麼多書商聚在一起是難得的，再加上會展就在cyt公司的對面，實在方便得很。
本來今年cyt雄心壯志的準備大殺四方，當cyt在hall 1廝殺過後直到grand hall，就被一位小妹妹攔住…就是green peace的義工，要求cyt寫上一張小咭給喜歡的作家，讓作家們下次出書時向出版社要求用再造紙印書…
「嗯，這個意念不錯嘛…」cyt寫完之後妹妹又說了好一段環保的資訊，最後一句：「都希望小姐係買書的時候要多三思啦，有時一本書可能等於一棵樹了。」
一本書等於一棵樹？不是嘛！剎那間拖喼凗裡彷彿有十幾本書，不，十幾棵樹在喊：「你殺左人呀！你下世等做樹啦你！」
Show me the text ▼
「一本書等於一棵樹」這句口號在cyt腦中揮之不去，去到hall 2，甚麼胃口也沒有了。其實cyt好支持用再造紙印書的，但…可不可以在書展開展前，在出版商開始印書前去建議和實行這個意念呢，而不是到書又印了包裝好了人人去到書展準備的時候才講： 「一本書等於一棵樹」？
也許是不敬了，但該剎那，cyt真的有這樣的感覺，下半場在書展裡cyt的內心真有點零落，想買書的時候，拖喼內的書又叫了。
終於買了14本書，有很多翻譯小說想買又不敢買：
1. 第十層地獄（寫＜姊姊的守護者＞JODI PICOULT又一力作）
2. 夜巡者
3. 八趣也（蔡瀾的書已經不想再買了，不過趣系列還是值得一看）
4. 從前有一隻粉碟（cyt對亦舒的支持是永不止息的）
5. 潔如新（同上）
6. 楚辭。九歌（其實cyt對天問的興趣多點。）
7. 綠色的馬（沒有看過九把刀的中短篇，買了，原來他在27日到書展扎簽名會，那80個籌第一天就派完了）
8. 拼命去死（都是九把刀啦－天堂不收，地獄絛］無門）
9. 大哥大（都還是九把刀，隨書附上電話繩一條，cyt對於此類不會用又不好意思送人丟了又好浪費的「小禮物」一點好感都沒有，我買你的書要條電話繩幹麼？送送書籤好了）
10. 做個快樂人（區樂民的新書，內容有點點點點重覆，也許是家中的變故令你無法用心寫作吧？）
11. 小機師，大夢想（由於yahoo!blog留意上的排他性令cyt好少看yahoo的blog，這本書我是在三聯買看到的，是一位史丹的blogger結集成書，以漫畫和文字描述他身位飛機師的日常生活小小事，那些小漫畫線條胖胖的懶洋洋的好可愛，而且內容很幽默，看著看著會笑出來，順便增進點飛行知識。對cyt來說，籃色的封面設計得很好，cyt總覺得很多blogger出的書的封面都不怎麼樣，甚至有幾本設計得很難看，這一本卻不同（也許cyt很愛籃，口味對了）。現在不是有很多書叫人邊看邊笑了，尤其當你見到周遭都是＜四川不哭＞，世界很沉重，看看這上小書笑一笑也很好，推介！
12. 可不可以天天出去玩（之前彎彎的繁體書買的超貴，這本便宜很多，買了都未看完，有點失望，我也說不出理由來。大概是旅遊日誌不對胃口吧，還是第一本最好看）
13. CEO實戰手冊（哈，一看書名就知不可能是cyt這小番薯看的，是替老闆買的，她很喜歡這個在都市日報寫專欄的王毅力，cyt找了好久才找到買這本書的攤位，就是在grand hall買完就被小妹妹攔住，竟被cyt買入作者親筆簽名版乙本，馬上拿回給老闆獻寶，呵）
14. 紐約客 白先勇
當cyt拿著紐約客去付款時，男友說了一句：「車，呢本唔好睇既！」
你又知？…「你知唔知邊個係白先勇呀？？」
男友醒目的答：「知！教育徑嘛！」
下??「咩？咩教育徑」？迷了。
「白先嶺教育徑囉！」
「八仙嶺呀！山名黎架！」
cyt笑到書也拿不住。
>
If you enjoyed this post, make sure you subscribe to my RSS feed !
July 21, 2008
我的生活小小事 No Comments cyt今個星期點都係開心架喇！就算日日做到無停手都要開心！因為：
書展而來了～～cyt已經請定假、襟定錢、帶定拖喼，星期四去公司對面（即係會展）大開殺戒！（即係比d書斬到一身都係血）
然後星期六男友三隻可愛到不得了的愛犬由外國回流返港，正！以後多左三隻寵物！
開心開心，keep住個mood繼續上！
If you enjoyed this post, make sure you subscribe to my RSS feed !
June 29, 2008
上網有野玩 2 Comments
終於diablo iii 有個正式既官方網頁，又有game video比大家望梅止渴下，但目前為止只係出左barbarian同witch doctor兩個角色咁大把，咁究竟diablo iii幾時先肯出呢？blizzard早知你會問，FAQ答埋你：
“It’s too early to estimate Diablo III’s release date. As with all Blizzard Entertainment games, our goal is to create a game that is as fun, balanced, and polished as possible. We intend to take as much time developing Diablo III as is necessary to ensure the game meets our own high expectations and those of our players.”
即係，有排等。
If you enjoyed this post, make sure you subscribe to my RSS feed !
June 9, 2008
我的生活小小事 2 Comments
…仲未係cyt，而係cyt大家姐。上年就神奇姐姐嫁，岩岩過左既呢個星期六就到大家姐喇。
cyt有幸做姊妹同埋今年終於良心發現識拎返個相機同黎影影相（其實主要原係因為想試下個40D 同埋三哥借左支閃比我，一身行頭好足所以唔怕部野見人），今次既婚禮攪得十分之成功，而且感人到非常，例如新娘註冊喊、係酒樓上台謝辭喊、同埋姐夫唱歌玩驚喜個陣都喊。但新娘喊，好正常，最攪笑既係二姐姐同姊姊S都喊，就係新娘註冊宣誓個陣喊，cyt&lsquo問二家姐同姊妹S喊咩呢，答案係：「好感動呀！」一自用紙巾印眼角。Show ▼
我仲以為因為家姐嫁左所以唔捨得佢而喊，原來因為外在環境因素。
cyt冇喊，因為太專心影相，都冇聽到一對新人講咩，噢，我做事真係專注。
cyt冇做過姊妹，發覺原來姊妹裙都幾焗的，大熱天時著住條長裙焗到對腳瘦幾吋呀，仲要著絲襪。再加件束腰內衣，肋骨都斷幾條，但效果好到不得了，點都整到條腰出黎，彷彿瘦到不得了，真係想日日都著住。
一個婚宴令cyt諗到好多好遠，例如：發覺cyt用閃光燈用得好差，因為平時冇咩機會所以唔多識用，下下都要photoshop，真係醜死人。同埋發覺人大了會多左係呢類場合影，唔，係時候入返支了，呵，580吧，之後又會諗，相機又多左鏡又多仲要多支閃，個紅A防潮箱又唔多夠位放，你話整返個電子防潮箱就十分好了，於是去左鴨記睇，$480喳陰公…又如果有個防潮箱，又玩大佢買多支marco就心滿意足了…唉…想得太遠了。
另外係呢一日，由姐姐嫁之前個晚見到姊妹到去到酒樓見到親戚，cyt最想聽到既就係呢句：「嘩，你瘦左咁多既！」「得喇，聽到廿次喇。」cyt都係咁回應，箍左牙之後都好少食野咯，今日cyt睇返一年之個樣，塊面真係好似生命方包咁，計計下cyt減左16磅，勁呀！
第二句成日聽到既係：「幾時嫁埋你去呀？」，無他既，當你又返咁上下年紀又有個比較穩定既男友再加上你兩個家姐一年散一個既時候，就係人都會問你，形成有一陣陣既壓力，好在，cyt男友又再一次發揮作用！呢d尷尬位拋返個波比佢：「同我諗個標準答案攪掂佢地啦！」
奸笑一笑，同xx親戚道：「呢d我話唔到事架嗃，你要問佢娶唔娶嗃！呵呵」又奸笑。
「…娶…娶…下年啦…下年差唔多架喇…」xx親戚滿意地走開。
「車，我下年都未箍完牙！」
「咩者，我意思係下年開始諗點攪！」
ok啦……
If you enjoyed this post, make sure you subscribe to my RSS feed !
May 24, 2008
我的生活小小事 8 Comments 話說cyt今次係先箍牙後剝牙既，因為牙醫話怕我對牙箍敏感，所以比一個星期我試下先再剝。一個星期轉眼又過，當中既生活真係講都無謂，因為實在太酸痛了，咩都唔駛食。個人都真係瘦了不少。
但有d野係避唔過既，cyt尋日心口掛住個勇字就去牙醫到剝牙，今次cyt先剝上 排第一隻臼齒（犬齒後面個隻牙），每邊一隻，上到去牙醫哥哥仁慈地問：「你咁怕痛，不如剝住一隻先慢慢黎啦，唔係你好痛架，又食唔到野。」
「唔駛！黎啦，我預左兩隻架喇，費事痛兩次。」結果…
Show me the text ▼
前後打四針，仲要有兩支係深深咁打入牙肉入面，最後個支針打係上顎到，個種痛竟然伸展到鼻尖，痛到cyt叫喊無力，又唔郁得，唔係就仲痛！
本來應該得一個醫生一個護士姐姐幫手，但慢慢3個護士都過哂黎幫手，因為本來護士姐姐A係幫手拎住d工具，但係cyt一黎已經緊張到捉住左佢雙手（呢位姐姐真係唔話得呀，cyt用力唔細架，個下同佢肌膚之親真係帶比cyt唔少既安全感），於是護士姐姐B過黎接手（工具），但cyt既慘叫聲直達天座，令住係出面reception位既護士姐姐C都動容，入埋黎安慰cyt。
事後醫生哥哥都好擔心自己係咪落少左麻醉藥，於是剝完第一隻後問：「其實剝個陣你係好痛者？你叫到咁大聲，係你我講聽丫，定係d麻醉未生效呀？？」
cyt靜起黎，隔左一陣先有返常性（叫個陣真係唔知自己做緊咩）：「er……其實唔痛既，但我好驚嘛，驚就叫架啦！」
全場爆笑，醫生都冇好氣，繼續。
醫生哥哥手勢可以用乾淨俐落去形容，兩分鐘，兩分鐘一對無做錯過任何事，健康無邪既臼齒就咁壯烈犧牲左。
護士姐姐好心的幫cyt用漂白水洗過對牙比返cyt，原來我d牙都幾大隻，隻隻都有成1.5cm咁長。
護士姐姐仲話佢自己剝智慧牙個陣將隻牙整做鎖匙扣。好變態，cyt一定唔會留住呢兩條「死屍」。
事後cyt內疚地同護士姐姐A講：「好在你地冇其他客喳，唔係比我嚇到生意都少幾單。」
溫柔護士姐姐A道：「冇野既，好多客都係咁叫。」安樂哂～
「……不過全部都係小朋友先係咁叫法。」噢…cyt只能答：「我既智商同年齡唔多成正比。」
當cyt含住兩舊棉花（醫生話頭一個鐘唔比開口講野)落樓之時，旺角中心有好多問卷妹妹係到捕獵，於是…
問卷妹妹：「小姐小姐幫我做份問卷丫，好快架喳！」
「唔…唔…唔」耍手檸頭（我唔會擘大口架！到時血流成河生靈塗炭！）
問卷妹妹：「小姐好快架喳，幾分鍾喳！」
「唔…唔…」我啞架！
問卷妹妹：「幫幫手丫小姐，唔該你丫！」
「嗚…嗚…嗚」唔好迫我出手！
終於妹妹聽到cyt低沉而帶有攻擊性既狗嗚聲而放行。
If you enjoyed this post, make sure you subscribe to my RSS feed !
